Translaziun

Hieronymus, patrun protectur da las translaturas e dals translaturs (purtret da Domenico Ghirlandaio) — Saint Jérôme, patrun da las translaturas e dals translaturs (ovra da Domenico Ghirlandaio)

En servetsch d’ina populaziun plurilingua sto l’administraziun federala publitgar ses documents en tudestg, en franzos ed en talian. Tscherts texts uffizials vegnan medemamain publitgads en rumantsch ed en englais.

La translaziun garantescha ch’ils texts vegnian recepids e chapids tant entaifer sco er ordaifer l’administraziun. Cun colliar las diversas linguas e culturas ina cun l’autra rinforza ella er la coesiun naziunala.

Las translaturas ed ils translaturs da l’administraziun federala

Per las translaziuns en las trais linguas uffizialas (tudestg, franzos e talian) èn responsabels ils suandants servetschs da l’administraziun federala:

ils Servetschs linguistics centrals da la Confederaziun, suttamess a la Chanzlia federala
ils Servetschs linguistics centrals dals departaments
las translaturas ed ils translaturs dals singuls uffizis federals

Da las translaziuns en englais s’occupan in servetsch linguistic central che fa part da la Chanzlia federala sco er las translaturas ed ils translaturs dals departaments e dals uffizis federals. Il Servetsch linguistic rumantsch è medemamain suttamess a la Chanzlia federala. El cumpiglia ina suletta persuna che coordinescha las translaziuns da l’entira administraziun federala.