La Chanzlia federala vegn incumbensada cun translaziuns rumantschas da tut l’administraziun federala ed è responsabla per lur coordinaziun.
Lingua naziunala e parzialmain uffiziala da la Confederaziun
Rumantsch è dapi l’onn 1938 ina lingua naziunala da la Svizra dasper il tudestg, il franzos ed il talian, francada en la constituziun. En la correspundenza cun persunas da lingua rumantscha è ella ina lingua parzialmain uffiziala.
Rumantsch grischun
En la correspundenza cun las autoritads federalas èn ils tschintg idioms rumantschs eguals; Las publicaziuns da la Confederaziun vegnan dentant publitgadas exclusivamain en la lingua unifitgada rumantsch grischun.
Collavuraziun e coordinaziun
La Chanzlia federala coordinescha las dumondas che reguardan la lingua rumantscha da tut l’administraziun federala en stretga collavuraziun cun la Chanzlia chantunala dal Grischun a Cuira. La Chanzlia federala definescha ensemen cun ils uffizis federals ed ils departaments publicaziuns impurtantas che vegnan en dumonda per ina translaziun rumantscha en in rom raschunaivel e bain realisabel.
Translaziuns
Mintg’onn vegnan translatadas en rumantsch var 1700 paginas A4; ca. dus terzs da quellas surpiglia la Chanzlia chantunala dal Grischun. Da quels texts fan part p.ex. la translaziun da novs decrets e lur actualisaziun sco er quatter giadas l’onn las explicaziuns dal Cussegl federal davart ils projects da votaziun federals ubain la broschura annuala «La Confederaziun en furma concisa». Ulteriuras publicaziuns sco paginas d’internet e blers auters texts vegnan translatads tut tenor basegn.
Terminologia
La Chanzlia federala endatescha la terminologia rumantscha stgaffind per par er novs terms. En la banca da datas terminologica da la Confederaziun (TERMDAT) chatt’ins perquai adina dapli endataziuns ed equivalents rumantschs. Er questa incumbensa surpiglia la Chanzlia federala en collavuraziun cun la Chanzlia chantunala dal Grischun.
Contact
Il post da coordinaziun per il rumantsch fa part da la Secziun da terminologia da la Chanzlia federala. Dumondas per incumbensas da translaziun pon ins drizzar a rumantsch@bk.admin.ch
Ulteriuras infurmaziuns
Contact
Servetschs linguistics centrals Secziun da terminologiaGurtengasse 3
3003 Berna
- Tel.
- +41 58 464 11 47
