La Chanzlia federala sustegna e cusseglia ils departaments cura ch’i va per preparar e per dumagnar crisas interdepartamentalas. Sin basa da las evaluaziuns da la Chanzlia federala davart la pandemia dal coronavirus vegn il management da crisas da l’administraziun federala actualmain optimà. L’Exercizi integrà 2025 duai verifitgar las meglieraziuns.
La Lescha davart l’organisaziun da la regenza e da l’administraziun (LORA) prevesa che la chanceliera u il chancelier federal sustegna il Cussegl federal per che crisas possian vegnir percepidas a temp e vegnir schliadas (art. 32 al. g LORA). Ultra da quai coordinescha ella u el sin plaun organisatoric las mesiras interdepartamentalas, per che crisas possian vegnir percepidas a temp e vegnir schliadas (art. 33 al. 1bis LORA).
Cumplementarmain a las disposiziuns da la LORA vegn actualmain elavurada in’Ordinaziun davart l’organisaziun da crisas da l’administraziun federala. Il Cussegl federal ha decis d’elavurar la nova ordinaziun tenor las experientschas da las crisas passadas. La finamira è quella da meglierar il management da crisas da l’administraziun federala.
En il rom da la meglieraziun da l’organisaziun da crisas è, tranter auter, previs in stab central permanent che furnescha differents servetschs als departaments en cas d’ina crisa ma er en la fasa da planisaziun e da preparaziun. El sa cumpona da collavuraturas e collavuraturs dal Departament da defensiun (DDPS), da la Chanzlia federala e, tut tenor eveniment, dad ulteriurs servetschs federals e rinforza uschia il management da crisas interdepartamental. Il stab central permanent permetta ina meglra cuntinuitad e coerenza en il management da crisas da l’administraziun federala ed in meglier mantegniment da la savida tranter las crisas.
En il sectur dal management da crisas furnescha la Chanzlia federala surtut ils suandants servetschs:
Las evaluaziuns ed ils rapports da la Chanzlia federala, da la Conferenza da las regenzas chantunalas e da las Cumissiuns da gestiun da las Chombras federalas davart il management da crisas en connex cun la pandemia dal coronavirus han mussà, ch'i dat in potenzial da meglieraziun. In stab central permanent, in stab da crisas politic e strategic ed in stab da crisas operativ furman las pitgas per ina meglra organisaziun da crisas da l’administraziun federala. Ultra da quai vul ins meglierar la collavuraziun cun ils chantuns e cun la scienza en connex cun l’organisaziun da crisas e rinforzar l’anticipaziun da crisas.
Per dumagnar las crisas cumplexas po il Cussegl federal installar en l’avegnir il stab da crisas politic e strategic. Quel vegn manà dal departament responsabel en cas d'ina crisa. Sia incumbensa è quella da preparar sin nivel politic las propostas per il Cussegl federal e da coordinar il management da crisas sin plaun interdepartamental, e quai cun integrar tut ils acturs relevants. Quest stab da crisas sa cumpona da las secretarias generalas resp. dals secretaris generals dals departaments pertutgads, dals dus vicechanceliers federals e da mintgamai ina represchentanta u in represchentant da l’Administraziun federala da finanzas, da l’Uffizi federal da giustia e dal Secretariat da stadi per l’economia. Ultra da quai instituescha il departament responsabel, sche necessari, in stab da crisas operativ che garantescha la coordinaziun tranter las unitads administrativas e ch’elavura las infurmaziuns ed ils documents da basa necessaris per il stab da crisas politic e strategic.
En il futur survegnan ils stabs da crisas in meglier sustegn sin plaun metodic ed administrativ. Questas prestaziuns duain vegnir furnidas d'in stab central permanent che sa cumpona da collavuraturas e collavuraturs dal DDPS, da la Chanzlia federala e, tut tenor eveniment, d'ulteriurs servetschs federals. Il stab central permanent permetta uschia ina meglra cuntinuitad ed ina procedura unitara en il management da crisas sco er in meglier mantegniment da la savida en il temp tranter las crisas. Sias incumbensas cumpiglian er quella d’integrar ils acturs relevants e da garantir la preschentaziun integrala da la situaziun. Intginas prestaziuns dal stab central permanent sco p.ex. la scolaziun ed il perfecziunament u l’anticipaziun da crisas, vegnan furnidas er durant il temp ordaifer las crisas.
Ils chantuns e la scienza e, tut tenor situaziun, ulteriurs acturs relevants vegnan integrads en las lavurs dal stab da crisas politic e strategic e da quel operativ. La responsabladad è tar il departament cumpetent che vegn sustegnì dal stab central permanent.
Grazia ad ina sinergia pli intensiva tranter il management da crisas da la Confederaziun, l’identificaziun tempriva da crisas, l’analisa cuntinuanta da la situaziun e dal context sco er las analisas dals departaments vegn meglierada la capacitad d’anticipar las crisas. Uschia ha il Cussegl federal la pussaivladad da realisar a temp in’organisaziun da crisas interdepartamentala.
Actualmain vegnan ils detagls elavurads en il rom d’ina nova ordinaziun ch’entra probablamain en vigur mez 2025.
.jpg)
