Management da crisas

La Chanzlia federala sustegna e cusseglia ils departaments cura ch’i va per preparar e per dumagnar crisas interdepartamentalas. Sin basa da la Lescha davart l'organisaziun da la regenza e da l'administraziun (LORA) e da l’Ordinaziun davart l'organisaziun da l'administraziun federala en cas da crisas (OCAF) ademplescha la Chanzlia federala differentas incumbensas en il sectur dal management da crisas. Ultra da quai è ella vegnida incumbensada dal Cussegl federal da manar il project per l’Exercizi integrà 2025 (EI 25), in exercizi da crisa sin plaun naziunal.

Dapi las evaluaziuns dal management da crisas da l’administraziun federala durant la pandemia dal coronavirus è il dumber d’incumbensas da la Chanzlia federala en il sectur dal management da crisas creschì fermamain. En vista a la realisaziun cooperescha la Chanzlia federala stretgamain cun ils departaments ed ils acturs chantunals.

En il sectur dal management da crisas furnescha la Chanzlia federala surtut ils suandants servetschs:

• Anticipaziun ed identificaziun tempriva da crisas
• Integraziun dals chantuns e da la scienza en l'organisaziun da l'administraziun federala en cas da crisas
• Communicaziun en cas da crisas (cumpetenza tar la Secziun communicaziun)
• Scolaziuns e perfecziunaments en il sectur dal management da crisas sco er barats d'experientschas
• Evaluaziun dal management da crisas suenter ina crisa concreta
• Cussegliaziun dals departaments avant e durant las crisas
• Exercizis en il sectur dal management da crisas
• Controlling da las fatschentas dal Cussegl federal en relaziun cun la crisa

Cun l’Exercizi integrà (EI 25) che ha lieu il november 2025, vegnan examinadas la nova organisaziun da l’administraziun federala e quellas dals chantuns en cas da crisas. Per quest intent vegnan per l’emprima giada in exercizi da commando strategic (ECS) ed in exercizi da la Rait naziunala da segirezza (ERNS) cumbinads in cun l’auter. La Confederaziun ed ils chantuns èn ensemen responsabels per la planisaziun, per la realisaziun e per l’evaluaziun.

L’organisaziun interdepartamentala da l’administraziun federala en cas da crisas

En in temp, en il qual las malsegirezzas sin plaun global creschan pli e pli fitg, ha il Cussegl federal, gia ils 29 da mars 2023, prendì ina decisiun da princip per optimar ses management da crisas. La finamira principala è da dumagnar las crisas smanatschantas uschè ditg sco pussaivel entaifer las structuras existentas da l‘administraziun federala, dentant cun proceduras acceleradas per augmentar l’effizienza. Ultra da quai duai la constataziun tempriva da crisas vegnir rinforzada per pudair reagir ad uras sin situaziuns che sa midan.

La nova Ordinaziun davart l’organisaziun da l’administraziun federala en cas da crisas (OCAF) è vegnida elavurada sin basa da la decisiun da princip dal Cussegl federal. Il focus è vegnì mess sin il nov management da crisas da l’administraziun federala cun trais elements centrals:

• Il Stab da crisa politic-strategic è responsabel per la preparaziun da decisiuns politicas e strategicas. El sa cumpona per regla da las secretarias generalas u dals secretaris generals dals departaments pertutgads, da las duas vicechancelieras u vicechanceliers, da l’Administraziun federala da finanzas, da l’Uffizi federal da giustia, dal Secretariat da stadi per l’economia e dal Secretariat da stadi per la politica da segirezza. Sch’ils chantuns èn pertutgads, vegnan els involvids sco cussegliaders.

• Il Stab da crisa operativ coordinescha mesiras per furnir al Stab da crisa politic-strategic infurmaziuns relevantas per decider e per realisar mesiras. El sa cumpona da represchentantas e da represchentants dals stabs da crisa en acziun e d’ulteriuras unitads administrativas pertutgadas dals departaments. Sin quest stgalim vegnan involvids er represchentantas e represchentants da l’Uffizi federal da giustia ed ils chantuns, sch’els èn pertutgads.

• L’Organisaziun da basa per il management da crisas gioga ina rolla centrala, cura ch’i va per preparar e per dumagnar crisas. Ella sa cumpona da collavuraturas e collavuraturs da la Chanzlia federala e da l’Uffizi federal da protecziun da la populaziun e po, sche necessari, vegnir cumplettada cun expertas ed experts da differents departaments. En ina situaziun normala lavuran las commembras ed ils commembers en lur funcziuns ordinarias ed èn pronts per dar sustegn en in cas da crisa.

 

Proceder cumplessiv per dumagnar crisas

In’autra cumponenta essenziala da la nova organisaziun da l’administraziun federala en cas da crisas è l’integraziun sistematica dals chantuns, da la scienza e, sche necessari, d’ulteriurs acturs relevants en ils stabs da crisa. Questa mesira promova in proceder cumplessiv per dumagnar las crisas e garantescha che tut las gruppas d’interess necessarias sajan represchentadas en moda adequata. Ultra da quai èn vegnidas stgaffidas en la OCAF las basas giuridicas per pudair engaschar il persunal da la Confederaziun tenor il basegn e per ina durada limitada a favur dal management da crisas da l’administraziun federala («pool da persunal administraziun federala»).

 

Modul d’online learning per la OCAF

Sin la pagina d’internet da l’Organisaziun da basa per il management da crisas (OBMC) sa chatta in access als dus moduls WBT davart il management da crisas en l’administraziun federala. (Link)

Ulteriuras infurmaziuns

Documente

Verbesserte Krisenorganisation der Bundesverwaltung. Bericht des Bundesrates in Erfüllung der Postulate 21.3205 FDP-Liberale Fraktion vom 17. März 2021, 21.3449 Sicherheitspolitische Kommission des Ständerates vom 25. März 2021 und 22.3343 Grünliberale Fraktion vom 18. März 2022 (PDF, 456 kB, 16.02.2024)

Alle Dokumente zum Krisenmanagement der Bundesverwaltung sind abrufbar unter:

Dokumentation Krisenmanagement

Communicaziun a las medias

Communicaziun a las medias per tudestg, per franzos e per talian: Il Cussegl federal meglierescha l'organisaziun da crisa da l'administraziun federala

20-12-2024

Il Cussegl federal meglierescha l'organisaziun da crisas da l'administraziun federala: En sia sesida dals 20 da december 2024 ha el approvà l'Ordinaziun davart l'organisaziun da crisas da l'administraziun federala (OPC) e mess en vigur quella per il 1. da favrer 2025. Questa ordinaziun ha la finamira da stgaffir las premissas necessarias per ch'ils stabs da crisa interdepartamentals possian vegnir engaschads svelt e sistematicamain e per ch'els possian preparar uschia l'administraziun federala en moda pli effizienta ed effectiva per situaziuns da crisa.

Communicaziun per las medias en tudestg, per franzos e per talian: il Cussegl federal meglierescha l'organisaziun dal management da crisas

29-03-2023

Il Cussegl federal duai esser preparà meglier per crisas e vegnir sustegnì en moda pli effizienta per dumagnar quellas. A sia sesida dals 29 da mars 2023 ha el decidì, sa basond sin las lecziuns resultadas da la pandemia da corona, da rinforzar l'organisaziun da l'administraziun federala per crisas futuras. En cas da crisas cumplexas po il Cussegl federal decider d'engaschar in stab da crisa sin il plaun politic-strategic e sin il plaun operativ. L'autoritad directiva suprema resta il Cussegl federal. Da nov duai ultra da quai in stab central permanent sustegnair ils stabs dals departaments en la superaziun da crisas. Fin la fin da l'onn 2023 ha il Cussegl federal incumbensà il DDPS e la Chanzlia federala d'elavurar ina basa legala per la nova organisaziun da crisas.

Basas legalas

Lescha davart l’organisaziun da la regenza e da l’administraziun (LORA)

ordinaziun davart l'organisaziun da crisa da l'administraziun federala (per tudestg, per franzos e per talian)

Links

UFFT Moduls per il management da crisas en l'administraziun federala