Rachel Salzmann, naschida ils 8 da december 1981, oriunda da Naters VS, ha studegià istorgia, scienza da las medias e da la communicaziun a l’Universitad da Berna e terminà il studi cun il licenziat l’onn 2007. Ella dispona d’in Executive Master of Business Administration cun approfundaziun en Public Management da la Scola auta spezialisada da Berna. Rachel Salzmann ha lavurà da 2012 fin 2018 al DATEC, ils ultims trais onns sco collavuratura persunala da l’anteriura cussegliera federala Doris Leuthard. Suenter ha ella midà sco Head Public e Regulatory Affairs tar la Credit Suisse Energy Infrastructure Partners AG. Avant l’engaschi tar la Chanzlia federala è ella stada manadra dal CEO-stab da l’assicuranza da malsauns CSS.
Rachel Salzmann è maridada, ha in figl ed abitescha cun sia famiglia a Berna. Ella è commembra da il Center.
Il 1. da fanadur è Rachel Salzmann entrada en ses uffizi sco vicechanceliera ed ha surpiglià la direcziun dal sectur "Cussegl federal". En questa funcziun è ella responsabla en coordinaziun cun il chancelier federal ed il pledader dal Cussegl federal per l’execuziun irreproschabla ed entaifer ils termins da tuttas incumbensas en connex cun la preparaziun, realisaziun ed elavuraziun posteriura da las sesidas dal Cussegl federal. Plinavant maina ella set unitads cun var 130 collavuraturas e collavuraturs. Tar questas unitads tutgan per exempel ils Servetschs linguistics da la Chanzlia federala ed il Center da las publicaziuns uffizialas.
