Andrea Arcidiacono, naschì ils 20 d’avrigl 1966 ed oriund da Bellinzona (TI), ha studegià economia da manaschi a l’Universitad da Son Gagl, nua ch’el ha fatg il licenziat 1991. En l’administraziun federala è el stà suppleant dal schef d’infurmaziun e pledader da la cussegliera federala Ruth-Dreifuss (1998-2002), sco er en la medema funcziun dal cusseglier federal Pascal Couchepin (2006-2007) ed el è stà pledader da l’Uffizi federala da sanadad publica (2017-2018). Plinavant ha el manà ils programs «Gottard 2016», «Italia/Expo Milan 2015» e «Verso Expo Milano 2015» da Preschientscha Svizra. En il sectur da las relaziuns publicas è el stà responsabel per la communicaziun da l’Universitad da la Svizra taliana (2003-2006) e da curafutura (2016-2017). El ha medemamain manà la communicaziun dal Tribunal administrativ federal a Berna (2009-2011). Fin settember 2024 ha el manà l’agentura Arcidiacono Consulting Partners Sàrl.
Andrea Arcidiacono è vicechancelier e pledader dal Cussegl federal dapi il 1. d’october 2024. Tenor cunvegnientscha cun il chancelier da la Confederaziun è el responsabel per l’infurmaziun da las medias e dal public, cusseglia il Cussegl federal e sias commembras e ses commembers davart dumondas areguard l’infurmaziun e la communicaziun e maina e coordinescha l’infurmaziun tranter il Cussegl federal, ils departaments e la Chanzlia federala. El maina il Sectur communicaziun e strategia che cumpiglia rodund 70 collavuraturas e collavuraturs. Sias collavuraturas e ses collavuraturs al sustegnan tar sias activitads en connex cun la communicaziun dal Cussegl federal, la presidenza da la Confederaziun, la planificaziun politica per il Cussegl federal e la gestiun da crisas.
Andrea Arcidiacono è da lingua materna taliana, sa tudestg, franzos ed englais. El n’è commember da nagina partida politica e viva a Berna.
