L'Ecosistem da datas Svizra ha la finamira da promover che acturs da l'economia, da la scienza, da l'administraziun e da la publicitad possian utilisar datas repetidamain ed en in rom fidabel. Uschia duai il potenzial da l'utilisaziun multipla da datas vegnir tratg a niz meglier. Il project davart l'Ecosistem da datas Svizra stgaffescha las basas che sustegnan d'etablir spazis da datas fidabels. El ademplescha uschia ina incumbensa dal Cussegl federal dals 8 da december 2023.
Las datas genereschan la pli gronda valur, sch'ellas pon vegnir utilisadas pliras giadas ed uschia per plirs cas d'applicaziun. Questa utilisaziun multipla da datas è in grond potenzial per la societad, l'economia, la scienza e l'administraziun. Spazis da datas simplifitgeschan l'utilisaziun multipla da datas che vegnivan fin ussa administradas ed utilisadas en structuras da silo. Cun installar spazis da datas duain las structuras da silo vegnir interruttas. Ils princips includents, sco per exempel la protecziun da datas, ston vegnir observads en quest connex.
Spazi da datas
In spazi da datas è ina structura tecnica ed organisatorica che pussibilitescha e regla la preparaziun, il barat e la retratga da datas da differentas funtaunas e da differents acturs. Ils spazis da datas èn savens organisads specificamain per il sectur e definids tras l'intent, cleras reglas e standards. In spazi da datas vegn organisà tras in administratur da spazis da datas.
Ecosistem da datas Svizra
Per utilisar datas efficaziamain sur las organisaziuns e sur ils secturs ora en Svizra, èsi necessari da stgaffir cundiziuns generalas giuridicas, organisatoricas, semanticas e tecnicas. Per quest intent realisescha la Confederaziun il project Ecosistem da datas Svizra.
Visiun
L'Ecosistem da datas Svizra duai crear in rom fidabel per spazis da datas, per che las datas possian vegnir utilisadas repetidamain a favur dal bainstar social, dal success economic e dal progress scientific. Ulteriuras infurmaziuns davart la visiun e las finamiras da l'Ecosistem da datas Svizra chattais Vus en il document Visiun e finamiras da l'ecosistem da datas:
Post da consultaziun per l'Ecosistem da datas Svizra
Per incumbensa dal Cussegl federal s'engascha il post da consultaziun per l'Ecosistem da datas Svizra, che la Svizra utiliseschia sias datas il meglier pussaivel. El sustegna interpresas, organisaziuns, administraziuns publicas e la scienza d'installar spazis da datas. Cun sviluppar standards cuminaivels e models da guvernanza garantescha il post da consultaziun, che las datas possian vegnir utilisadas en in rom fidabel ed en moda cumpatibla tranter ellas. Il post da consultaziun lavura en l'entira Svizra e promova ultra da quai il barat cun projects internaziunals da spazis da datas. Ses servetsch è gratuit e cuntanschibel sut la suandanta adressa dad e-mail: dataspaces@bk.admin.ch
Contact
Bereich Digitale Transformation und IKT-Lenkung (DTI)
Monbijoustrasse 91
3003 Bern