TERMDAT – la banca da datas terminologica da l’administraziun federala

TERMDAT è ina banca da datas terminologica voluminusa e plurilingua che porscha in agid varià per la communicaziun, per la redacziun e la translaziun. En TERMDAT chatt’ins la terminologica giuridica ed administrativa da la Svizra sco er ulteriura terminologia davart l’administraziun publica. A moda simpla e gratuita, accessibla en la rait, cuntegna la banca da datas endataziuns oravant tut en las quatter linguas naziunalas – tudestg, franzos, talian, rumantsch – ed en englais.

Vocabulari tecnic da l’administraziun federala

TERMDAT cuntegna la terminologia tecnica da divers secturs dal dretg a da l’administraziun sco er da numerusas autras domenas sco la furmaziun, l‘energia, las finanzas, il commerzi, l‘industria, l‘informatica, la cultura, l‘agricultura, la medischina, il militar, las scienzias natiralas, la politica, la tecnica, la telecommunicaziun, l’ambient, il traffic, l’economia. In’impurtanza tut speziala ha la terminologia dal dretg federal svizzer.

Denominadas correctamain, traslatadas correctamain

Las endataziuns en TERMDAT explitgan la terminologia dal dretg e da l’administraziun. Ultra da quai porschan ellas per il solit er ils equivalents en las ulteriuras linguas naziunalas sco er en englais. Tgi che sto damai translatar in term tecnic en in’autra lingua, po grazia a TERMDAT esser franc d’utilisar l’expressiun correcta.

Sper ils terms tecnics, las definiziuns ed annotaziuns (p.ex. davart il diever dals terms) porscha TERMDAT ulteriuras infurmaziuns praticas sco las designaziuns ed abreviaziuns uffizialas d'autoritads, instituziuns ed organisaziuns svizras ed internaziunalas sco er ils titels e las abreviaziuns da tut ils decrets federals.

Accessibla dapertut ed a moda rapida

TERMDAT è accessibla en la rait sin www.termdat.ch – a moda gratuita, simpla e rapida.

Coordinaziun e collavuraziun

TERMDAT cuntegna er endataziuns dals chantuns plurilings da la Svizra (BE, FR, GR, VS) ch'èn tranter auter represchentads cun lur servetschs linguistics en l'organ da coordinaziun per la collavuraziun d'instituziuns publicas en dumondas da terminologia (CoTerm). Qua tras contribueschan er els a la cumplettaziun dal effectiv da datas.