La Secziun sustegn al commando strategic (SACS) è responsabla per formular ils rapports da gestiun e da planificaziun dal Cussegl federal e garantescha la furmaziun en il sectur dal manaschament da crisas a l’intern da l’administraziun federala.
Planificaziun ed identificaziun tempriva
En collavuraziun cun ils departaments elavurescha la Secziun SACS il program da legislatura cun las finamiras correspundentas dal Cussegl federal. Per pudair preparar il program da legislatura coordinescha la Secziun SACS in rapport per il Cussegl federal che consista da contribuziuns dad expertas ed experts internaziunals davart las sfidas definidas a lunga vista. Ultra da quai analisescha la SACS cuntinuantamain tendenzas globalas che pudessan avair per la Svizra in potenzial da crisa strategic a media vista (analisa ed identificaziun tempriva) resp. lur consequenzas per la planificaziun politica (analisa da la situaziun e dal context).
Instruments dal rendaquint
Mintg’on elavurescha la SACS en collavuraziun cun ils departaments il rapport da gestiun che cuntegna ils temas principals dal Cussegl federal. La Secziun verifitgescha plinavant tut las fatschentas dal Cussegl federal, sch’ellas èn confurmas a la politica globala dal Cussegl federal ed è responsabla per la controlla dals mandats dal Cussegl federal e dal parlament.
Gestiun da crisas
La Secziun SACS porscha als departaments ils suandants servetschs en il sectur da la gestiun da crisas:
- sustegn metodic e logistic e cussegliaziun en cas da crisas interdepartamentalas
- furmaziun en il sectur da la gestiun da crisas
- planificaziun, realisaziun ed evaluaziun dals exercizis da commando strategic (ECS)
Conferenza dals secretaris generals
La SACS accumpogna la Conferenza dals secretaris generals e maina il secretariat.
