Secziun sustegn al commando strategic

La Secziun sustegn al commando strategic (SSCS) è responsabla per formular ils rapports da gestiun e da rendaquint dal Cussegl federal e sustegna ils departaments en il management da crisas.

Planificaziun ed identificaziun tempriva

En collavuraziun cun ils departaments elavurescha la Secziun SACS il program da legislatura cun las finamiras correspundentas dal Cussegl federal. Per pudair preparar il program da legislatura coordinescha la Secziun SACS in rapport per il Cussegl federal che consista da contribuziuns dad expertas ed experts internaziunals davart las sfidas definidas a lunga vista. Ultra da quai analisescha la SACS cuntinuantamain tendenzas globalas che pudessan avair per la Svizra in potenzial da crisa strategic a media vista (analisa ed identificaziun tempriva) resp. lur consequenzas per la planificaziun politica (analisa da la situaziun e dal context).

Instruments dal rendaquint

Mintg’on elavurescha la SACS en collavuraziun cun ils departaments il rapport da gestiun che cuntegna ils temas principals dal Cussegl federal. La Secziun verifitgescha plinavant tut las fatschentas dal Cussegl federal, sch’ellas èn confurmas a la politica globala dal Cussegl federal ed è responsabla per la controlla dals mandats dal Cussegl federal e dal parlament.

Gestiun da crisas

La squadra dal management da crisas da la Secziun sustegn al commando strategic sustegna e cusseglia ils departaments cura ch’i va per preparar e per dumagnar crisas. En quest rom è ella er responsabla per l’identificaziun tempriva da crisas e per la collavuraziun cun ils chantuns e cun la scienza. Suenter ina crisa pli gronda po ella, ultra da quai, evaluar il management da crisas da l’administraziun federala. Plinavant organisescha ella differents exercizis da crisa ensemen cun u per ils departaments presidials.

Conferenza dals secretaris generals

La SACS accumpogna la Conferenza dals secretaris generals e maina il secretariat.

https://www.bk.admin.ch/content/bk/rm/home/bk/organisation-der-bundeskanzlei/sektion-strategische-fuehrungsunterstuetzung.html