Center da las publicaziuns uffizialas (CPU)

Il Center da las publicaziuns uffizialas (CPU) maina la gestiun da la plattafurma da las publicaziuns dal dretg federal sin admin.ch. El sustegna ils uffizis federals cun preparar ils texts che duain vegnir publitgads en il Fegl uffizial federal (FF) u en la Collecziun uffiziala da las leschas federalas (CULF). Plinavant actualisescha el cuntinuadamain la Collecziun sistematica dal dretg federal (CS).

Correctorat e producziun

Mintg’onn vegnan publitgadas en il FF ed en la CULF var 40’000 paginas en las trais linguas uffizialas. Quai correspunda a passa 2’500 fatschentas da publicaziun che vegnan elavuradas da 650 differentas utilisadras e differents utilisaders da l’administraziun federala. La lavur dal CPU è cumparegliabla a la lavur da las correcturas e dals correcturs en ina chasa editura. El formatescha las publicaziuns uffizialas a moda unifurma e fa ina controlla finala dals texts.

Collecziun da las leschas

La CS cumpiglia var 5’000 acts dal dretg naziunal e dal dretg internaziunal en lur versiun vertenta. Mintg’onn vegnan modifitgadas passa la mesadad da las var 65’000 paginas da la Collecziun sistematica. Ils acts pertutgads vegnan actualisads en la rait en las trais linguas uffizialas il di ch’ellas entran en vigur. La CS cuntegna er las constituziuns dals chantuns en las trais linguas uffizialas da la Confederaziun. Malgrà che la CS n’è betg giuridicamain valaivla, è ella in utensil indispensabel che vegn duvrà da millis da giuristas e giurists en Svizra. Ina part dals acts da la CS è er disponibla en rumantsch ed en englais.

Ulteriuras publicaziuns

Ultra da quai publitgescha il CPU ils documents davart las proceduras da consultaziun, actualisescha la Collecziun dal dretg davart las cunvegnas bilateralas e s’occupa da la publicaziun da la Pratica administrativa da las autoritads federalas (PAAF).

Plattafurma dal dretg federal

Tut las publicaziuns dal CPU èn disponiblas sin la plattafurma dal dretg federal, ina da las paginas da l’administraziun federala las pli bain frequentadas cun 3,5 milliuns clics sin la pagina e 0,8 milliuns visitadras e visitaders en media per mais. 

La basa legala da las activitads dal CPU èn principalmain la Lescha dals 18 da zercladur 2004 davart las publicaziuns uffizialas (LPubl, CS 170.512) e l’ordinaziun correspundenta (OPubl, CS 170.512.1).