La qualitad terminologica definescha per gronda part la qualitad d’in text tecnic, saja quai in text original ubain ina translaziun. Perquai è la terminologia d’impurtanza considerabla per la communicaziun e per l’intermediaziun da savida.
Tge è la terminologia?
Cur ch’ins discurra da terminologia manegian ins en emprima lingia il vocabulari tecnic appartegnend ad in champ particular, per exempel la terminologia da la medischina, dal dretg u da la planificaziun dal territori.
La terminologia cumpiglia dentant era la lavur terminologica, numnadamain l’activitad d’endatar, elavurar e derasar vocabularis tecnics. Questa activitad po esser punctuala, sco en il cas da l’activitad terminologica dals translaturs. Ella po dentant era esser sistematica, sco en il cas dals terminologs ch’elavuran il vocabulari tecnic per in sectur particular.
Las redacturas, ils translaturs e las interpretas, ils giurists, ils spezialists da communicaziun, las scienziadas ed ils tecnicists, tuts han da far di per di cun la terminologia.
L’impurtanza da la terminologia
La qualitad terminologica definescha per gronda part la qualitad d’in text tecnic, saja quai in text original ubain ina translaziun. La terminologia utilisada è la garanzia per la clerezza e per la chapibilitad d’in text.
Perquai è la terminologia d’impurtanza considerabla per la communicaziun e per l’intermediaziun da savida.
La terminologia en l’administraziun federala
La decentralisaziun da las activitads plurilinguas en l’administraziun federala pretenda ina coordinaziun effectiva da las lavurs da terminologia ed in access rapid a las infurmaziuns relevantas. Mo uschia pon ins garantir in standard da qualitad cuntinuant ed evitar lavurs dublas e sforzs nunnecessaris.
La Secziun da terminologia da la Chanzlia federala garantescha questa coordinaziun cun divers servetschs en las linguas uffizialas, en rumantsch ed en englais. Cun quai garantescha ella er che la terminologia en TERMDAT, la banca da datas terminologica da la Confederaziun, saja accessibla al public.
Uschia contribuescha la terminologia considerablamain ad in’auta qualitad da la communicaziun plurilingua e da l’intermediaziun d’infurmaziuns.
Furmaziun
La Secziun da terminologia porscha mintg’onn entgins curs da retschertga en TERMDAT sco era in fin dus curs da metodologia en pliras linguas.
Ulteriuras infurmaziuns
Contact
Servetschs linguistics centrals Secziun da terminologiaGurtengasse 3
3003 Berna
- Tel.
- +41 58 464 11 47
