L'incumbensà federal per la protecziun da datas e per la transparenza (IFPDT) è responsabel per dus secturs: per la lescha federala davart la protecziun da datas (LPD) e per la lescha federala davart il princip da la transparenza da l'administraziun (lescha da transparenza, LTrans).
Protecziun da datas
L'IFPDT s'engascha - en sia funcziun d'incumbensà federal per la protecziun da datas - per la protecziun da la sfera privata. Quel s'engascha per la protecziun da la sfera privata. Suttamessas a sia surveglianza èn – en moda differentamain intensiva – elavuraziuns da datas tras ils organs federals e tras persunas ed organisaziuns privatas. L'IFPD po far examinaziuns e proponer da midar u da sistir l'elavuraziun da datas, sche las prescripziuns legalas da la protecziun da datas vegnan violadas. L'IFPD infurmescha e cusseglia era persunas privatas, organs da la Confederaziun e dals chantuns en dumondas da la protecziun da datas.
Princip da transparenza
Il princip da transparenza permetta a persunas – independentamain da lur naziunalitad e da lur domicil – d'acceder a documents uffizials da l'administraziun federala e dals servetschs dal parlament. Sco incumbensà federal per la transparenza cusseglia l'IFPDT persunas privatas davart las modalitads da l'access ed autoritads a realisar il princip da transparenza. Sche l'autoritad e la persuna che fa la dumonda na pon betg vegnir d'accord davart l'access, po vegnir dumandada ina procedura da mediaziun tar l'incumbensà per la transparenza. Sche questa procedura da mediaziun na maina betg a l'accord giavischà, fa l'incumbensà per la transparenza ina recumandaziun. Sche las parts participadas na van betg d'accord cun quella, relascha l'autoritad cumpetenta ina disposiziun contestabla.
