Secziun sustegn al commando strategic
La Secziun Sustegn al commando strategic (SSCS) sustegna il Cussegl federal en tut ils secturs da la planisaziun politica. Ella prepara ils rapports da planisaziun e da rendaquint dal Cussegl federal, maina il secretariat da la Conferenza dals secretaris generals ed accumpogna ils discurs von Wattenwyl, che han lieu quatter giadas per onn tranter las commembras ed ils commembers dal Cussegl federal e las partidas ch'èn represchentadas en il Cussegl federal. Ultra da quai elavura ella la tematica dal management da crisas sin plaun federal: Ella sustegna e cusseglia ils departaments en connex cun la preparaziun e la superaziun da crisas interdepartamentalas ed è responsabla per planisar, realisar ed evaluar exercizis da crisa sin plaun politic-strategic.
Planisaziun strategica e rapport da gestiun
Avant la legislatura analisescha la Secziun SSCS – en collavuraziun cun ils departaments e cun expertas ed experts externs – a lunga vista e cuntinuadamain la situaziun ed ils conturns. Questa analisa serva ad identifitgar ed ad anticipar a temp ils svilups, las schanzas e las sfidas las pli impurtantas dals proxims 10 fin 15 onns. A maun da questa analisa sco er d'ulteriuras basas strategicas elavura la Secziun SSCS, ensemen cun ils departaments, la missiva tar la planisaziun da la legislatura dal Cussegl federal cun ils accents politics e cun las finamiras strategicas per la proxima legislatura. Ultra da quai coordinescha la Secziun SSCS las finamiras annualas dal Cussegl federal ed elavura, ensemen cun ils departaments, il rapport da gestiun dal Cussegl federal per mauns dal parlament. La finala è la Secziun SSCS er responsabla per il controlling dal Cussegl federal. Cun quest controlling surveglia il Cussegl federal las incumbensas ch'el ha dà als departaments da l'administraziun federala.
Management da crisas
La Secziun SSCS sustegna e cusseglia ils departaments en connex cun la preparaziun e la superaziun da crisas. Latiers tutgan en spezial l'identificaziun tempriva e l'anticipaziun da crisas sco er l'integraziun dals chantuns e da la scienza. Ultra da quai è la Secziun SSCS responsabla per la scolaziun ed il perfecziunament en il sectur dal management da crisas sco er per la planisaziun, la realisaziun e l'evaluaziun d'exercizis da crisa sin plaun politic-strategic. Suenter ina crisa pli gronda po ella plinavant evaluar il management da crisas da l'administraziun federala.
Conferenza dals secretaris generals e discurs von Wattenwyl
La Secziun SSCS sustegna la Conferenza dals secretaris generals (CSG), l'organ da coordinaziun suprem da l'administraziun federala, e maina ses secretariat. Ultra da quai organisescha ed accumpogna ella ils discurs von Wattenwyl, nua che las commembras ed ils commembers dal Cussegl federal sa scuntran quatter giadas per onn cun las direcziuns da las partidas ch'èn represchentadas en il Cussegl federal, per discutar davart temas politics actuals.
Ulteriuras infurmaziuns
Contact
Chasa federala vest
3003 Berna