Vicechancelier Viktor Rossi

Viktor Rossi, vicechancelier dapi il matg 2019 (fotografia Lukas Wittwer, 2019).

Viktor Rossi è naschì ils 31 d’october 1968 ed è oriund da Berna e da Pietravairano (Italia). El ha absolvì la scolaziun per magistras e magisters da dretg ed economia a l’Universitad da Berna, nua ch’el ha obtegnì l’onn 1996 il titel da «magister rerum politicarum». Ultra da furmaziuns supplementaras en il sectur da la gestiun da projects e da process, ha el obtegnì l’onn 2015 in «Diploma of advanced studies in Law».

Avant ses servetsch tar la Chanzlia federala è signur Rossi stà durant 11 onns directur da la scola commerziala «Bildung Formation Biel-Bienne (BFB)». Durant quest temp è el stà vicepresident e secretari da la Conferenza da las scolas professiunalas e da las scolas spezialisadas superiuras dal chantun Berna ed ha presidià la Conferenza dals recturs da las scolas professiunalas commerzialas dal chantun Berna.

 

Signur Rossi è entrà en il servetsch da la Chanzlia federala l’october 2010. L’emprim ha el manà la Secziun gestiun da las fatschentas e logistica. Il 1. da november 2015 è el vegnì elegì dal chancelier federal sco incumbensà per GENOVA, in project-clav d’informatica per introducir en l’administraziun federala centrala in sistem da standard per la gestiun da las fatschentas.

 

Il 1. da matg 2019 è Viktor Rossi entrà en ses uffizi sco vicechancelier ed ha surpiglià la direcziun dal Sectur Cussegl federal. En questa funcziun è el, en coordinaziun cun il chancelier federal ed il pledader dal Cussegl federal, responsabel per exequir en moda irreproschabla ed entaifer ils termins tut las incumbensas en connex cun la preparaziun e l’elavuraziun posteriura da las sesidas dal Cussegl federal. Plinavant maina el set unitads d’organisaziun en reguard strategic, concepziunal, persunal e finanzial. Tar questas unitads tutgan per exempel ils Servetschs linguistics da la Chanzlia federala ed il Center da las publicaziuns uffizialas.

 

Signur Rossi è da lingua materna tudestga/taliana e discurra franzos ed englais. El è maridà e bab da duas figlias creschidas.

https://www.bk.admin.ch/content/bk/rm/home/bk/vizekanzler-joerg-de-bernardi.html