La Chanzlia federala coordinescha la gestiun electronica dals affars da l’entira Confederaziun.
Sut la coordinaziun generala da la Chanzlia federala vegnan dirigidas e manadas dapi il 1. da schaner 2013 tut las activitads da la Confederaziun che pertutgan la gestiun electronica dals affars (GEVER). La basa per quest’incumbensa furma l’Ordinaziun davart la gestiun electronica dals affars en l’administraziun federala (Ordinaziun GEVER). La GEVER Confederaziun procura oravant tut per la realisaziun da la strategia da gestiun da la Confederaziun (planisaziun da quatter onns GEVER Confederaziun) ch’è vegnida approvada da la Conferenza dals secretaris generals.
Product unitar e process senza midada da medium
En il center da las incumbensas stat actualmain la gestiun dal program GENOVA. En quest program vegn standardisà in product GEVER (Acta Nova) – ch’è vegnì acquistà en ina procedura OMC – ed introducì en l’entira administraziun federala centrala fin il cumenzament da l’onn 2020. Ultra da quai identifitgescha la GEVER Confederaziun ils process da lavur che concernan pliras unitads administrativas. Quels pon vegnir reglads sur la GEVER senza midada da medium e duain uschia optimar l’effizienza e la transparenza da la collavuraziun tranter ils departaments.
Ulteriuras infurmaziuns davart la GEVER Confederaziun (pagina tudestgas).
