La Secziun dals dretgs politics è responsabla per exequir ils dretgs dal pievel (iniziativas federalas dal pievel, referendums facultativs), per preparar las votaziuns ed elecziuns federalas (votaziuns e renovaziun totala dal Cussegl naziunal) sco er per coordinar l'introducziun da la votaziun electronica tras ils chantuns (uschenumnà vote électronique). Ella è er responsabla per preparar respectivamain per exequir ils decrets legislativs (Lescha federala davart ils dretgs politics, Ordinaziun davart ils dretgs politics, Ordinaziun da la Chanzlia federala davart la votaziun electronica e differentas circularas) sco er per examinar ordavant, sche las disposiziuns executivas chantunalas èn cumpatiblas cun il dretg federal.
Dretgs dal pievel
En connex cun iniziativas dal pievel e cun referendums facultativs ha la Secziun d'ina vart l'incumbensa da cussegliar ils comités correspundents, da preparar l'examinaziun preliminara da las iniziativas dal pievel per mauns dal chancelier federal sco er da retschaiver e da controllar las suttascripziuns attestadas e da constatar che las iniziativas u ils referendums sajan reussids. Da l'autra vart guarda la Secziun ch'ils termins legals da tractament vegnian observads, ella cusseglia ils departaments e/u las cumissiuns parlamentaras en dumondas processualas e procura per il monitoring fin a la terminaziun da la tractativa parlamentara. Plinavant retschaiva ella petiziuns drizzadas al Cussegl federal ed attribuescha quellas als departaments cumpetents.
Davart ils dretgs dal pievel sin plaun federal vegn manada ina banca da datas cumplessiva ch'è accessibla publicamain.
Votaziuns ed elecziuns federalas
Er la planisaziun e la preparaziun da las votaziuns e da las elecziuns dal Cussegl naziunal tutga tar la cumpetenza da la
Secziun. Per las elecziuns dal Cussegl naziunal prepara la Secziun il decret da l'ordinaziun dal Cussegl federal davart la repartiziun dals sezs sin ils chantuns, ed ella examinescha, sch'igl ha eventualmain candidaturas dublas tranter tut las propostas electoralas entradas tar ils chantuns. En cas da votaziuns federalas prepara ella las propostas al Cussegl federal per fixar ils singuls projects. Plinavant elavura ella per mintga votaziun u elecziun federala las instrucziuns dal Cussegl federal als chantuns. En cas da recurs redigia ella ultra da quai posiziuns al Tribunal federal e prepara il sboz dal conclus da verificaziun respectivamain suenter las elecziuns dal Cussegl naziunal il rapport electoral dal Cussegl federal al cussegl nov elegì.
En pli maina la Secziun il register da las partidas.
Vote électronique
En il rom dal project "Vote électronique" promovan la Confederaziun ed ils chantuns cuminaivlamain la digitalisaziun dals dretgs politics. La finamira è quella d'introducir en l'entira Svizra il vote électronique per elecziuns e per votaziuns. Manaders da project sco tals èn ils chantuns. Els decidan, cura ed en tge etappas ch'els vulan introducir il chanal da votaziun electronic. La Secziun sustegna activamain ils chantuns en tut las dumondas giuridicas, organisatoricas e tecnicas e coordinescha il project sin plaun naziunal.
