La Secziun communicaziun da la Chanzlia federala (ChF) coordinescha la communicaziun dal Cussegl federal cun las medias, cun la publicitad, cun ils chantuns e cun il parlament.
Communicaziun da la regenza
Suenter las sesidas emnila dal Cussegl federal ha lieu per regla ina conferenza da medias sut la direcziun dal pledader dal Cussegl federal ed ina represchentanta u in represchentant dal Cussegl federal. La Secziun communicaziun organisescha la conferenzas da medias, permetta il live-stream e publitgescha ina versiun curta sin il chanal da video dal Cussegl federal. Ella infurmescha plinavant davart las decisiuns sin admin.ch e Twitter.
Infurmaziuns davart las votaziuns
Avant las votaziuns dal pievel elavurescha la Secziun communicaziun ensemen cun ils departaments ina broschura davart ils projects da votaziun. Il “carnet da votar” vegn tramess per posta a var tschintg milliuns votantas e votants. Dapi l’onn 2016 publitgescha la secziun er videos curts ch’explitgan mintga project da votaziun. Els cumpletteschan las explicaziuns da votaziun ed ils dossiers da votaziun sin admin.ch.
Portal ch.ch
La Secziun communicaziun metta a disposiziun en collavuraziun cun ils chantuns il portal ch.ch. Sin il portal chatt’ins respostas a las dumondas da burgaisas e burgais en connex cun las autoritads e la democrazia.
Lavur da medias e dialog cun ils burgais
La secziun organisescha la communicaziun da las fatschentas da la ChF. Ella respunda a las medias, elavurescha reglas linguisticas, sustegna il chancelier federal durant ses discurs publics e tracta las dumondas da las burgaisas e burgais. Ultra da quai organisescha la secziun mintgadi il manaschi dal center da medias e las accreditaziuns dals schurnalists.
