Ils caders superiurs da l'administraziun federala vegnan suttamess ad ina controlla da segirezza da persunas. Il Servetsch spezialisà per las controllas da segirezza da persunas da la Chanzlia federala è cumpetent exclusivamain per las controllas da segirezza extendidas cun interrogaziun (stgalim da segirezza suprem), e quai primarmain per las funcziunarias ed ils funcziunaris tschernids dal Cussegl federal.
La finamira da la controlla da segirezza da persunas è quella da garantir che la persuna controllada na saja betg ina ristga per la segirezza. Sia integritad e sia fidabladad ston esser avant maun senza dubis. La persuna na dastga esser ni extorcabla ni corruptibla pervia da sias circumstanzas da vita, e ses cumportament na dastga er betg chaschunar ina ristga da reputaziun.
En il center da las controllas da segirezza da persunas stat l'interrogaziun da la persuna tras il Servetsch spezialisà per las controllas da segirezza da persunas da la Chanzlia federala. Quest discurs serva a far in "maletg cumplet" da la persuna. En quest connex vegnan er tematisads secturs privats.
Durant l'interrogaziun vegn eruì e registrà il curs da la vita da la persuna, uschenavant che quel è relevant sut aspects da segirezza. Latiers tutga l'examinaziun da la reputaziun.
