Entschatta dals cuntegns

Entschatta dal navigatur

navigaziun da cronologia (breadcrumb trail)

Fin dal navigatur




Activitads


Lavur terminologica sistematica

La metoda principala per l’elavuraziun d’endataziuns terminologicas e la lavur sistematica tenor champs tematics. Quai signifitga ch’il vocabulari tecnic d’in champ specific determinà exactamain vegn elavurà (p.ex. planisaziun dal territori, biomedischina, dretg d’obligaziuns, dretg penal).

Talas lavurs sistematicas vegnan realisadas savens sin dumonda d’in uffizi u d’autras instituziuns partenarias. La Secziun da terminologia è responsabla en tals projects per la coordinaziun, per la controlla da qualitad e presta agid metodic. En la banca da datas terminologica TERMDAT metta ella a disposiziun las collecziuns terminologicas elavuradas.

Tar la lavur terminologica vegnan resguardadas las quatter linguas naziunalas svizras – il tudestg, il franzos, il talian ed il rumantsch – e per part l’englais.

Cussegliaziun ed accumpagnament

La Secziun da terminologia sustegna ils uffizis federals ed auters posts spezialisads per optimar lur lavur terminologica, per schlargiar il corpus da lur endataziuns terminologicas e per derasar lur terminologia en las linguas naziunalas ed en englais. Ultra da quai accumpogna e cusseglia ella las utilisadras ed ils utilisaders da la banca da datas terminologicas e porscha scolaziuns davart la lavur terminologica e l’utilisaziun da TERMDAT.

Avais vus avant d’elavurar in project terminologic? La Secziun da terminologia As stat gugent a disposiziun!

Scolaziuns

creaziun d’endataziuns en TERMDAT sco er curs da metodologia e lavuratoris terminologics.

Per ulteriuras infurmaziuns pudais Vus gugent contactar la Secziun da terminologia.

Participaziun a barats e congress naziunals ed internaziunals

La Secziun da terminologia collavurescha a nivel naziunal stretgamain cun auters uffizis publics, oravant tut cun las administraziuns chantunalas. Ella ha per exempel stabilì contracts da cooperaziun en il champ da la terminologia cun ils chantuns Berna, Friburg, Grischun e Vallais.

Universitads, instituts da perscrutaziun ed auters posts spezialisads dal maun public survegnan in access gratuit a l’entira banca da datas terminologica TERMDAT, ch’ins po consultar sulettamain en l’intranet da l’administraziun federala. Persunas privatas survegnan mo in access a TERMDAT en connex cun projects communabels e sco recumpensa per ina contribuziun substanziala a l’engrondiment da la collecziun terminologica da la Confederaziun.

A nivel internaziunal realisescha la Secziun da terminologia cun ils servetschs linguistics d’auters stadis gronds projects terminologics e sias collavuraturas e ses collavuraturs participeschan activamain a congress dal fatg ed a barats d’infurmaziuns e d’experientschas.

Administraziun da las datas

La Secziun da terminologia administrescha e gestescha la banca da datas terminologica da la Confederaziun TERMDAT. Ella è responsabla per ina actualisaziun constanta ed ina tgira permanenta da las endataziuns. Adattond TERMDAT a las innovaziuns tecnicas actualas sviluppa la Secziun da terminologia la banca da datas ed adattescha quella constantamain als novs basegns da sias utilisadras e da ses utilisaders.

Fin dals cuntegns