Entschatta dals cuntegns

Entschatta dal navigatur

navigaziun da cronologia (breadcrumb trail)

Fin dal navigatur



Administraziun electronica

L’administraziun electronica duess augmentar la transparenza e la fiduzia en l’activitad dal guvern e da l’administraziun. Perquai sa stenta la Confederaziun da porscher ses servetschs effizientamain, en qualitad perfetga, da di e da notg. Interacziuns electronicas simplas e segiras duessan facilitar il stgomi tranter las unitads administrativas dal stadi, tranter il stadi e la populaziun e tranter las autoritads e las fatschentas. Er la lavur administrativa tranter la Confederaziun, ils chantuns e las vischnancas duai vegnir simplifitgada. Perquai vul la Confederaziun elavurar bunas cundiziuns e directivas per la collavuraziun cun ils chantuns, las vischnancas e l’economia.

Sco basa per quest svilup ha il Cussegl federal decis ils 24 da schaner 2007 sia strategia davart l’administraziun electronica svizra. Quai dess pussibilitar cun novas tecnologias d’infurmaziun e da communicaziun en tut la Svizra in’administraziun statala effizienta ed economica, organisada tenor ils basegns da las burgaisas e dals burgais. Tant la Confederaziun sco ils chantuns han definì lur collavuraziun per il svilup da l’administraziun electronica sco impurtanta incumbensa strategica cuminaivla da tut ils nivels administrativs. Ina collavuraziun intensiva duess permetter da profitar da sinergias e da meglierar l’effizienza. Ins ha elavurà cuminaivlamain las incumbensas e las directivas da basa per pudair cuntanscher las finamiras cun in catalog dals projects prioritars. La realisaziun concreta da la strategia han la Confederaziun ed ils chantuns reglamentà en ina cunvegna generala per ils onns 2007 fin 2010.

La strategia davart l’administraziun electronica svizra fa part da la strategia per la societad d’infurmaziun svizra dals 18 schaner 2006.

Tut las ulteriuras infurmaziuns datti mo en tudestg, franzos e talian.

Fin dals cuntegns