La Secziun fatschentas dal Cussegl federal (SFCF) sa deditgescha al coc da las activitads guvernamentalas. Ella s'occupa da las circa 2500 fatschentas ch'ils departaments suttamettan mintga onn a la deliberaziun tras il Cussegl federal. Ella planisescha las sesidas dal Cussegl federal, elavura las glistas da tractandas, maina tras la procedura da cunrapport e redigia ils conclus dal Cussegl federal.
Management da sesidas dal Cussegl federal
Il Cussegl federal salva tranter 40 e 60 sesidas per onn. Durant las var 100 uras da sesida vegnan tractadas mintga onn circa 2500 fatschentas. Per la sesida emnila vegnan suttamessas en media 50 fatschentas a la deliberaziun tras il Cussegl federal.
La SFCF controllescha che las fatschentas dal Cussegl federal, ch'èn vegnidas annunziadas dals departaments e da la Chanzlia federala, sajan cumplettas e guarda che tut las fatschentas arrivian a temp. 4 dis avant la sesida dal Cussegl federal fa ella lura la glista da tractandas. Uschespert ch'in departament u la Chanzlia federala inoltrescha ina proposta, avra la SFCF la procedura da cunrapport cun reparter la proposta a tut ils ulteriurs departaments ed a la Chanzlia federala. Ils cunrapports e las posiziuns inoltradas latiers vegnan resumads tras la SFCF e preschentads sin la glista da differenzas. Il di da sesida serva quella lura al Cussegl federal per tractar e per deliberar las fatschentas. Suenter la finiziun da la sesida redigia la SFCF ils conclus dal Cussegl federal ed infurmescha ils departaments davart las decisiuns.
Directivas per fatschentas dal Cussegl federal
Tenor l'art. 15 al. 2 LORA regla la Chanzlia federala la procedura da cunrapport. Cun agid da las directivas per fatschentas dal Cussegl federal vegn realisada questa incumbensa. Las activitads da la SFCF sa basan sin questas directivas ch'èn enconuschentas sco "Ordinatur cotschen". Ellas reglan la preparaziun e la liquidaziun da las fatschentas dal Cussegl federal e cuntegnan tut las prescripziuns da procedura sco er models per concepir las propostas dal Cussegl federal. L'Ordinatur cotschen è in med auxiliar per ils departaments e per la Chanzlia federala per preparar las fatschentas dal Cussegl federal.
Administraziun da las intervenziuns parlamentaras e da l'ura da dumondas
La SFCF administrescha er las var 1300 intervenziuns parlamentaras che vegnan inoltradas mintga onn al Cussegl federal d'in u da plirs commembers dal Cussegl naziunal u dal Cussegl dals chantuns, d'ina cumissiun u d'ina fracziun, ed ella organisescha la resposta da questas intervenziuns.
Al cumenzament da la segunda e terza emna da sessiun ha lieu in'ura da dumondas en il Cussegl naziunal per tractar dumondas actualas. Là respunda in represchentant dal Cussegl federal dumondas che commembers dal Cussegl naziunal han inoltrà ordavant en scrit. La SFCF organisescha las lavurs en connex cun l'ura da dumondas e coordinescha las circa 470 dumondas ch'il Cussegl federal sto respunder en media mintga onn.
